ទិដ្ឋភាពទូទៅ
កំពង់ស្ពឺ ខេត្តមួយក្នុងចំណោម ២៥ រាជធានី ខេត្ត នៃព្រះរាជាណាចក្រកម្ពុជា ហើយមានចម្ងាយ ៤៨ គីឡូម៉ែត្រ ខាងលិចរាជធានីភ្នំពេញ មានព្រំប្រទល់ខាងកើតជាប់នឹងខេត្តកណ្តាល និងខេត្តតាកែវ ខាងត្បូងជាប់នឹងខេត្តតាកែវ និងខេត្តកំពត ខាងលិចជាប់នឹងខេត្តព្រះសីហនុ និងខេត្តកោះកុង ខាងជើងជាប់នឹងខេត្តកំពង់ឆ្នាំង និងខេត្តពោធិសាត់។
ខេត្តកំពង់ស្ពឺ ចែកជា ៧ ស្រុក ១ ក្រុង និងមាន ៨២ ឃុំ និង៥ សង្កាត់ ភូមិមានចំនួន ១,៣៧៩ ក្នុងនោះភូមិមានក្របខ័ណ្ឌចំនួន ១,៣៦៨ ភូមិ និងភូមិអត់ក្របខ័ណ្ឌមានចំនួន ១១ ភូមិ។ មានផ្ទៃដីសរុប ៦,៩៦៩.៦៣ គីឡូម៉ែត្រការ៉េ មានប្រជាពលរដ្ឋសរុបចំនួន ៨៤៨,០៧៦ នាក់ ក្នុងនោះស្រ្តីមានចំនួន ៤៣១,៩៦២ នាក់ មានគ្រួសារសរុបចំនួន ១៧៨,៥៩០ គ្រួសារ ក្នុងនោះគ្រួសារប្រកបរបរកសិកម្មមានចំនួន ៧២.៩% និងមានដង់ស៊ីតេប្រជាពលរដ្ឋ ១២៣ នាក់ក្នុងមួយគីឡូម៉ែត្រការ៉េ ។ ខេត្តមានវិស័យកសិកម្មជាវិស័យស្នូល និងមានវិស័យចម្បងផ្សេងៗទៀតដូចជា វិស័យធនធានទឹក អប់រំ សុខាភិបាល និងវិស័យការងារ ក្រៅពីនេះក៏មានការប្រើប្រាស់ដីធ្លី ធនធានធម្មជាតិ រដ្ឋបាល និងសន្តិសុខ។
