កំពង់ស្ពឺ៖នារសៀលថ្ងៃទី ២៦ ខែមិនា ឆ្នាំ ២០២០ ឯកឧត្តម វ៉ី សំណាង អភិបាល នៃគណៈអភិបាលកំពង់ស្ពឺ បានអញ្ជើញចែកម៉ាសនិងទឹកអាកុលជូនទៅដល់មន្ទីរ អង្គភាពជុំវិញខេត្ត កងកម្លាំងទាំងបី និងរដ្ឋបាលក្រុង ស្រុកទាំង៨ ដើម្បីយកទៅប្រើប្រាស់ក្នុងការបង្ការ និងទប់ស្កាត់នៃការរីករាលដាលជំងឺកូវីដ១៩ (COVID-19) ដែលជាជំនួយសប្បុរសរបស់បូរីផ្ទះល្វែង ឈុន ទីន ក្នុងការចូលរួមការងារមនុស្សធម៌ស្របទៅតាមការអំពាវនាវរបស់រាជរដ្ឋាភិបាល ក៏ដូចជារដ្ឋបាលខេត្តកំពង់ស្ពឺ ។
ឯកឧត្តម វ៉ី សំណាង អភិបាល នៃគណៈអភិបាលខេត្ត បានលើកឡើងថា ការចូលរួមបរិច្ចាគនូវថវិកាផ្ទាល់ខ្លួនក៏ដូចជាសម្ភារ:ប្រើប្រាស់របស់សប្បុរសជន នៅពេលនេះគឺជាកាយវិការបង្ហាញពីទឹកចិត្តសប្បុរសធម៌ និងការចេះជួយគ្នាទៅវិញទៅមកនៅក្នុងគ្រាលំបាក ។
ឯកឧត្តម វ៉ី សំណាង បានសង្កត់ធ្ងន់ថា ក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតី តេជោ ហ៊ុន សែន កម្ពុជានឹងអាចយកឈ្នះនូវជំងឺកូវីដ១៩ នេះ តាមរយៈការរួបរួមគ្នាប្រយុទ្ធ និងការពារពីសំណាក់ប្រជាពលរដ្ឋខ្មែរនៅទូទាំងប្រទេស។
ឯកឧត្តមក៏បានបញ្ជាក់ផងដែរថាជារៀងរាល់ថ្ងៃ តាមបណ្ដាមន្ទីរអង្គភាពជុំវិញខេត្ត កងកម្លាំងទាំងបី និងក្រុងស្រុកទាំង៨ បាននិងកំពុងអនុវត្តជារៀងរាល់ថ្ងៃនូវយុទ្ធនាការផ្សព្វផ្សាយដល់ប្រជាពលរដ្ឋអំពីវិធានការបង្ការ និងទប់ស្កាត់នៃការរីករាលដាលជំងឺកូវីដ១៩ តាមខ្នងផ្ទះរបស់ប្រជាពលរដ្ឋ ក៏ដូចជាមូលដ្ឋានក្នុងដែនសមត្ថកិច្ចរបស់អាជ្ញាធរ ស្របតាមគោលការណ៍របស់ក្រសួងសុខាភិបាល ។
សូមបញ្ជាក់ផងដែរថា គិតមកដល់ត្រឹមថ្ងៃនេះ ខេត្តកំពង់ស្ពឺ មិនទាន់មានករណីជំងឺកូវីដ 19 កើតឡើងនៅឡើយទេ ៕
